||
正字正音
□ 龚慧枫
早排去客家地区出差，循例要试下当地嘅美食。坐落打开菜牌，见到有一味“清炒脉菜”，好奇心起点嚟试下。当地嘅朋友话畀我听，脉菜喺当地系常见蔬菜，品种繁多，有苦脉、甜脉、油脉、香脉等等。我心念一动：乜咁似我哋啲油麦菜嘅？
清炒脉菜一上桌，我几乎大叫出声：呢啲之唔系我哋嘅油麦菜啰！原来客家人叫佢脉菜。脉同麦，普通话同白话嘅发音一样，但真系唔系人人都知佢哋居然系同一种蔬菜嚟。
噉究竟应该将佢写作系“脉菜”定系“麦菜”呢？返到广州我急急去查证，终于喺字典入面揾到咗一个“荬”字。根据《现代汉语词典》入面讲，“荬”字普通话读音mǎi，即系“苣荬菜”咁解。苣就系莴苣，又叫莴笋，同“荬”菜系同一个品种。《实用汉字字典》入面更加清楚咁记载住：荬，植物名。吴其濬《植物名实图考》载有“苦荬”“苣荬”数种，嫩茎叶可食。由此可见，无论系脉菜抑或麦菜都系错误嘅写法，呢种蔬菜名嘅正确写法应该系“荬菜”先啱。
种“荬菜”粗生快长，病虫不侵，所以喺省内无论广府、潮汕同客家地区都广有种植，实在算得上系“大路货色”。我哋可以随便喺广州任何一间食肆点一味“豆豉鲮鱼炒油麦”，包有得食。不过，点菜嗰阵我哋都好应该负责告知老细，油麦菜嘅正确写法系“油荬菜”，唔系人人都知口架，你好快啲改返喇
