||
正字正音
□Highyun
同食有关嘅动作，通常都有个口字边，例如吃、咬、喫、噬、嗒、吞等等。咀嚼食物，广府话叫做“赵嘢食”，有人就想当然揾个“口”加同音嘅“赵”，造出个“口赵”。此举实在系阿茂整饼，冇嗰样整个样，真正嘅[ziu6]字晨早就有，而且仲早到两千几年前经已用紧。
《汉书·高帝纪上》有噉嘅记载：“项羽为人慓悍祸贼，尝攻襄城，襄城无噍类，所过无不残灭。”大意系讲，楚霸王项羽好残忍，攻陷襄城之后，入去杀尽当地居民，杀到“无噍类”。所谓“噍类”，即系识得用牙咬碎食物嘅动物，实情就系人或者其它动物。噍，正正就系今日所讲嘅“用牙噍食物”、“噍香口胶”嘅“噍”。
睇返噍嘅动作，唔止咬咁简单，譬如食豆腐、香蕉呢啲咁软嘅食物，只需摆入口咬三两下就吞得，唔使反复咀嚼，故此唔算噍。至于粟米、肉类，甚至椰子、蔗、槟榔，呢啲嘢食都要有返咁上下牙力噍先有福消受。有种落好少水煮到好硬嘅米饭叫虾公米，据说有啲牙齿好嘅人零舍钟意，贪佢够噍头，越噍越有味。
有句俗语叫牛噍牡丹———唔知花定草，形容啲人唔识好嘢，暴殄天物。牛食草时，把口噍噍下，口噏噏噉款，噍一大轮先吞落肚。牡丹花象征富贵高雅，若果呢种高贵嘅花畀只唔识赏花嘅牛食，就认真嘥料，佢只会当草噉噍，辣口摧花，而且，摧花之后，仲会一走了之，实行噍完松。
噍jiao
