||
唔咸唔淡
□ 潘健生
市场上熙熙攘攘,田鸡档人头涌涌。一位粗心嘅仁兄行埋档口,匆忙对卖田鸡嘅档主话:“老细,唔该称一斤田鸡畀我,”然后又话:“我先去嗰边买啲青菜,等阵返嚟攞。”
档主:“冇问题。而家田鸡抵食啦,过年前15蚊斤,而家12蚊斤。劏埋?”
仁兄:“梗系啦,而家边有人自己买啲生嗷嗷嘅嘢返屋企劏架?”
档主:“要唔要保留剥出嚟层田鸡皮啊,层皮好爽滑喔。”
仁兄:“嗰层皮黑麻麻,鬼噤核突,专家仲话,煮唔熟会有丝虫,咪制,畀都唔要!”
档主:“乜嘢话?髀都唔要?”
仁兄再次坚定咁话:“畀都唔要!”
档主:“哦。”
于是嗰位仁兄大安之矣,交钱,买菜,取货,返归。返到屋企打开个塑胶袋一睇,眼都琼埋:成堆田鸡剩系得啲酮体及前肢,后腿全无。呜呼!
广州话“畀”系给与嘅意思,“髀”则系指大腿。嗰位仁兄讲“畀都唔要”系白送亦都不要的意思,而档主却听成“髀都唔要”即大腿都不要的意思,误会由此发生。“髀”系田鸡中最有肉、啲肉最爽嘅嘅精华部分啊。返转头再去市场,太麻烦,唯有食少啲啦。敬请买卖双方嘅各位街坊们注意听真啲喇!