|
□ 王婉芳
阿辉：咦？喺民政呢度见到你噶，我嚟攞结婚证，你咩事啊？
阿明：唉，嚟亲呢度嘅，不外乎两种人嘅啫，好似你呢啲单身贵族就嚟注册结婚；好似我呢挺做咗老衬嘅，唔方好嘢，梗系掟煲离婚咯。
阿辉：吓？唔系啊嘛？咁大剂？你哋两公婆唔系好好哋嘅咩？使唔使搞成噉啊？签字未嘎，唔通冇得掹咩？
阿明：唔系阿嫲，系阿爷。唔使嘥口水劝我嘞。生米煮成熟饭，红簿仔变蓝簿仔，十分钟搞掂，重快过打针！
阿辉：咁化学嘎？两公婆嘅嘢，唔系床头打交床尾和嘅咩？你两个几夹嘎，唔通真系逃唔过“三年之痒”？有咩拗撬，点解唔将就下啫？
阿明：大家互相睇唔顺眼，好难顶。我数佢婚前阴声细气、温柔体贴，婚后河东狮吼、脾气暴躁；婚前爱做家务，婚后懒过条蛇。佢数我之前斯文有礼、关怀体贴，而家粗口连篇、冷漠自私喔。当初一见钟情，结咗；而家一怒之下，就离咗啰。算罢啦，而家离婚算咩事啫？听讲2012年全国离婚个案超过310单啦，今年或者会破纪录添，多我一个唔多、少我一个唔少咯。
阿辉：睇你真系轻松，好似嚟攞奖噉，咁睇得开，冇唔开心嘎？
阿明：唔系噉可以点啫？勉强冇幸福，既然相处唔到，不如分开，大家重好过啲。
阿辉：唉，以前离婚几慎重啊，要组织证明、单位调解，好多手续。父母嚟劝、亲戚帮口做和事老，宁教人打仔莫教人分妻，而家呢，自己事自己办，冲动一嚟，即刻搞掂，唔使隔夜。屋企人插手嗰啲，唔单只救唔到火，分分钟重火上加油、死得更快添。
阿明：都系噉话啦。世界变吖嘛。
