|
春眠不觉晓,畀人闹得少
□ 王婉芳
春困,成日打喊露都唔止,嗰日,阿强瞌眼瞓瞌瞌下竟然趴喺办公台度瞓到好似只猪噉样,偏偏咁唔好彩又撞啱畀老板娘入嚟见到。阿强吓到当堂成个人醒晒,上班时间噉嘅款噉样嘅状态,老世知道咗肯定黑口黑面啦,加上旧年以嚟自己啲业绩认真麻麻哋,再唔好好表现真系听豉椒炒鱿都似。即刻控制事态发展,千祈咪畀老板娘添油加醋吹枕边风,喺老世面前话自己呢样唔妥嗰样唔掂至得。将功补过,献殷勤刷下鞋梗要口架啦。阿强即刻快快脆脆去茶水间冲杯咖啡送去畀老板娘。点知肥佬论尽,呢匀重死多几钱重添,因为对新皮鞋唔啱脚,一下重心唔稳行歪咗,手起杯落,竟然整湿咗老世份文件,重落地开花打烂老板娘嗰只如珠如宝嘅结婚纪念杯添!老板娘嬲到块面猪肝噉色,阿强唯有口噏噏“食嘢唔做嘢,做嘢打烂嘢”,耷低头闹自己唔使老板娘埋嚟“照肺”咯。
第日晨早,老婆问阿强唔瞓晏啲添,阿强肴晒头话:“重敢迟到?嫌命长啊?你估真系‘春眠不觉晓,畀人闹得少’咩?”