|
一直觉得白话入面有啲歇后语嘅意思同普通话歇后语相似，比如“水瓜打狗———唔见一截”同“肉包子打狗———有去无回”，又比如“斩脚趾避沙虫”同“削足适履”。水瓜脆嫩，用嚟打狗自然一下就折断，少咗一截；肉包诱人，用嚟打狗更加系一去不会返，呢两句用于形容损失惨重嘅歇后语，认真生动盏鬼。
细个嗰阵，阿妈怕我读书分心，好迟先喺屋企安装有线电视，我仅余嘅一啲港剧印象，系由本地电视台引进播出嘅。当年有出以顺德自梳女为背景嘅电视剧畀我嘅印象最深，陈秀雯同罗嘉良分别饰演男女主角，佢哋喺戏入面成日借一道顺德菜嚟传情达意，嗰道餸叫做“水瓜煮芋头”。每次罗嘉良食呢道餸都会含情脉脉咁望住陈秀雯，我嗰阵情窦未开，唔知道“有情饮水饱”嘅道理，觉得一定系因为道餸好味到冇得顶，于是成日缠住阿妈要佢整畀我食，阿妈次次都话：”咪搞，水瓜好湿热啊！”
好多年之后，一次同阿妈去食顺德菜，我心血来潮点咗呢道餸。可能系我之前想象得太好，一试觉得味道不过不失，冇咩特别，不过水瓜煮出嘅汁用嚟捞饭，倒系几和味。阿妈一路食一路同我坦白，原来佢之前唔肯整呢道餸，系因为唔知道煮水瓜唔可以一开始就放盐，唔系啲瓜肉就会变黑，咁影响卖相以及影响煮妇权威嘅事，佢系唔会做嘅。后嚟请教咗菜贩知道咗诀窍，见我又冇再提，于是就作罢喇。睇嚟我同呢道餸嘅缘分实在唔够深。
有次介绍外省籍同事用丝瓜络煲冰糖，可以医好佢嘅咽喉炎，点知佢饮咗两次之后同我投诉：“饮就唔难饮，不过冇乜效嘅。”我花费九牛二虎之力先搞清楚原来佢将水瓜当成系丝瓜，据佢讲喺外省水瓜同丝瓜系冇分嘅，顶多分为“有棱丝瓜”同“无棱丝瓜”。我唯有同佢解释：“我查过书喇，水瓜同丝瓜系同科不同种嘅，都有降火凉血清热解毒祛痰化瘀等嘅功效，你若果想医咽喉炎，一系就用‘有棱丝瓜’络煲冰糖，一系就继续用‘无棱丝瓜’络，饮多几次可能都有效嘅。”讲完我都唔知个同事明白咗未，但我自己就真系畀所谓嘅“有棱”同“无棱”搞到头都大埋。同事饮完几次之后话畀我听似乎真系有效，所以我觉得嗰句传统歇后语都应该改一改喇，水瓜唔应该用嚟打狗，而应该用嚟煮芋头，或者系煲冰糖凉茶。
