||
香瓜系我屋企夏日常备嘅水果，我哋习惯叫佢做“梨瓜”，因为佢甜脆似梨。我爸爸对呢种瓜情有独钟，成日话：“我由细到大都叫梨瓜做‘蜜糖埕’。‘心肝腚，蜜糖埕’，你听过未？”我将呢句话直译成普通话，即系“心尖子，蜜罐子”，将心入面最钟意嘅人或物等同于呢种瓜，可见香瓜嘅香甜入心。
屋企食“蜜糖埕”通常系批皮之后以十字形切开，一分为四，爸爸钟意连埋啲核一齐吞落肚，我就喜欢好姿整咁将啲核清到干干净净，三个人一人一块瓜，最尾总会剩低一块，边个食好呢？我哋两父女其实都心思思，但又唔好意思，最后唯有扮高风咁你让我我让你，当然通常都系入咗我把口。
香瓜都有近亲。细个嗰阵有次临开饭，阿妈同我讲：“今日我买咗花鸡乸，等阵就有得食。”我以为“花鸡乸”即系鸡，等阵间实系有鸡汤饮喇。点知成餐饭食完，连鸡脚都冇只。我鼓起勇气问阿妈：“唔系话有鸡食咩，点解冇嘅？”阿妈攞出一只表皮暗绿色有花纹嘅瓜话：“你系话‘花鸡乸’？佢系瓜，唔系鸡啊！”我之后问返爸爸，佢笑住话：”你阿妈啲佛山话难怪你听唔明，木瓜佢就叫淤瓜，花瓜佢就叫花鸡乸！花瓜即系伽师瓜，同鸡一啲关系都冇。”
眨下眼咁多年，我都咁大个喇。想食香瓜唔使等爸爸妈妈买，自己都可以想食就买，以前成日想将个瓜平均分三份，无奈数学学得太差，始终都谂唔明，直到见到“奔驰”个标志，先至灵机一触。
我最终冇买到老板娘热情推介嘅香瓜，而家嘅我，对香瓜嘅感情悲喜参半，咁系因为喺记忆入面香瓜总牵系住我嘅爸爸，两年喇，我日复一日不可抑止咁挂住佢。
无论再过几多年，我谂我会永远记得：我系爸爸嘅心肝腚，爸爸佢最钟意食蜜糖埕。
