|
乌率率遇着乌瀡瀡 |
街坊话事 □ 何小猫 小新:柴哥,一牌唔见差啲唔认得你添,成个黑炭头噉,去学古天乐晒太阳灯扮型仔啊? 黑柴:边系啊,揾到份工喺水上乐园看场,一日暴晒7、8个钟,想唔黑都难啦,而家个个都叫我黑仔。讲起黑仔,寻日就当黑,差啲畀阿sir抄牌。 小新:你又乱停乱放? 黑柴:人有三急吖嘛,跑去厕所返嚟见到阿sir抄牌,佢用唔咸唔淡嘅英文同我讲嘢,我鬼识听咩,即刻撒手兼拎头,阿sir望咗我两眼,尴尴尬尬走嘞。 小新:即系你冇食到牛肉干啦?阿sir肯定见到你乌率率,顶住个即食面头,以为你系非洲佬,鸡同鸭讲点开罚单啊,咪放你一马啰,你好彩有惊无险。 黑柴:估唔到噉都可以畀我蒙混过关,睇嚟我电呢个咁潮嘅发型都有好处。 小新:个阿sir咁乌龙,真系乌瀡瀡,佢应该留意下你棚烟屎牙就见到破绽啦,黑人棚牙个个都白雪雪口架。 黑柴:我有个非洲朋友嫌广州太热,返咗刚果避暑,佢重讲笑介绍个非洲美女畀我添,衬到绝。 小新:你呢个假冒黑皮肤,过咗夏天就打回原形啦。 黑柴:我老窦话,我就似黑鬼,阿妹戴蓝色大眼仔、头发染成金黄色,化埋妆成个鬼妹噉,我哋屋企真系成个联合国噉。 小新:我同老婆嗌交请你哋呢个联合国维和部队出马都得啦,哈哈。 |