|
□ 曾锦燊
上次写过一篇《曾经嘅广州潮语》，讲嘅系1960- 1980年代间，广州嘅部分坊间俗语，其实仲有唔少，宜家继续讲下。
一粒星———一毫子，
一条嘢———十蚊，
一草嘢———一百蚊，
一栋嘢———一千蚊，
一粒嘢———一万蚊，所以“我都有两粒零一栋啦，好巴闭咩？”系当时嘅流行语。
八路军——— 八毫子一日嘅临工。
教官——— 特指宽头皮鞋。
包顶颈——— 中山装或军干装；
老上———上海装；
老西———西装。
省镜———好靓；
好乔——— 好新潮或好有型。
黑颈、乌鼠——— 乡下佬、老土，含有鄙视嘅意思。
抓七——— 拿锄头，又指上山下乡。
街八——— 背后对街道及居委会人员嘅鄙称。
三点头———党员。
打牙铰——— 吹水。
度叔——— 孤寒、抠门。
国际码头——— 滥交嘅女性。
食镪——— 食烟。
有咸水——— 有亲朋在港澳或海外接济。
托冰———即度水、借钱；
托住先——— 借住先。
望鸽——— 到与己方有过节嘅人家附近踩点。
踢窦——— 踩场。
水路、中路、陆路——— 偷渡香港嘅三种方式，分别代表游水、爬铁丝网、攀火车。
死咗———坐监，后嚟又叫做衰咗。
入栅、出栅——— 入监、出监。
两份——— 即两年，特指刑期，如“衰咗两份”即判咗两年。
食2两半、受紧——— 正在坐监。
练(音链)过——— 打过、拼过。
撚样、撚款———衰样，笑人或闹人时用。
拖埋架罉——— 带齐家伙(刀、水管、火药枪等)。
地勤——— 蓝色嘅空军地勤服。
马骝衣———泛指某些有震慑力嘅制服，如军服、警服等；用于嘲笑或鄙视某人拉大旗作虎皮招摇过市：“着住件马骝衣，扮晒嘢！”
