||
正字正音
□ 司徒笨笨
楔，查《辞海》有四个解释。其一系“楔子”，即经过人工削成嘅上粗下尖嘅长三角形小竹木片。斗木佬斗木嗰阵，如果发现榫眼位有松动嘅话，就会用楔子打入空隙之中，令接榫嘅地方可以稳固。木工会将呢个工序叫做入楔。呢个亦系“楔”字嘅名词用法。
第二个用法则系作动词用，表示“用楔形物插入”。《礼记丧大记》：“小臣楔齿用角柶。”呢度嘅“楔齿”就系撬开死者嘅牙关(垫上角质嘅匙羹，目的系殡殓嘅时候将金石放入死者嘅口中)。因为“楔”字嘅呢个用法，所以一般会认为广州话当中嘅“楔高枕头谂一谂”或者“楔灶罅”里面嘅“sip3”音，正字就系“楔”。不过古人亦造咗一个剔手边嘅“揳”，表示“打进楔子或钉子”，所以“楔灶罅”亦应该可以写成“揳灶罅”。
讲返嗰块三角形嘅木头，除咗叫“楔”之外，重可以叫“櫼”。《说文》：櫼，楔也。前面讲过嘅“入楔”，又可以叫做“打櫼”。后尾“打櫼”引申出“喺中间插入”嘅含义，亦就用嚟形容唔守规矩嘅“插队”行为啦！只不过“櫼”字太难写，先变成“打尖”。广州话当中亦有用“楔”表示“插队”嘅意思，譬如“楔位”。呢个亦充分讲明“楔”同“櫼”嘅本义系相同嘅。
此外，重有一个“片妾”字可以表示呢块三角形嘅木头。《集韵》：片妾，小楔。不过呢个“片妾”比较生僻，而家已经冇人再用，连《辞海》都唔收佢啊！
