||
粤讲粤俗
□ 何凤仪
广东系海上丝绸之路嘅起点，亦系历史上有名嘅商埠城市，临水通商而且水产资源丰富，广州方言同水有住独特又微妙嘅关系，所以广州人开口埋口，成日都会提起“水”。如睇水(把风)、散水(解散)、度水(借钱)、水皮(冇本事)、水货(走私货)、口水多过茶(特别多嘢讲)、半桶水(一知半解)。
我去陈记糖水店打包几碗糖水，以前三蚊一大碗绿豆沙，而家五蚊都系得大半碗，“陈老板，碗糖水劲缩水，你都食水好深啫。”“你唔当家唔知米贵，灯油火蜡、铺租咩都升价，你以为赚你好多咩？！”“少咗咁多好明显你掠水，我谂下都系回水去帮衬走鬼个阿姨好过，人哋大碗过你好多。”“做走鬼唔使交铺租，自己醒水啲唔好畀城管抓，个个都赚到猪笼入水，好过我开铺添。不过我哋起码卫生有保证，见你熟客仔，咪开玩笑嗱嗱临磅水，最多畀大碗啲你啦。”
“食水”本意系船舶水位嘅深浅，船身“食水位”越深，等于运载嘅货物越重，证明赚取嘅利润就更多。引申义就变成中间环节赚钱嘅收益，“水”为钱财，“食”为赚取，“食水”越深就赚钱越多。
“缩水”本意系讲衫裤用水洗过之后，尺寸变得比原来细咗。但系交易里面嘅缩水，系指所购买嘅商品分量同之前相比明显少咗，或者货不对版。
“掠水”指占人便宜，引申为欺骗钱财。“回水”本身指水受到障碍物嘅影响倒流，而家都变成退钱嘅意思。醒水系醒目嘅意思，猪笼入水指财源滚滚，而磅水即系畀钱嘅意思。
