||
粤讲粤白
□ 王婉芳
“洗湿个头”,喺广东话里面系指件事开始咗,返唔倒转头、收唔倒手、唔做唔得嘅意思。即系用洗头理发来比喻件事开咗头,唔可以唔做到底,身不由己噉解,一般指衰嘢或者件事有风险。所以,呢句歇后语后面实质上省略咗一句,应该系“洗湿个头———唔剃唔得”噉样讲至啱。
嗰晚,阿辉约埋班老友喺露台度一边啤一啤,一边喂蚊。见佢头耷耷、烦过梵蒂冈嗰个样,以为咩事啦。原来话闭翳个女友有咗,烦紧做唔做老衬喔。华记开口就似足老窦闹仔嘅口吻:“搞出人命,想唔使负责任啊?可以点啫?摆酒啰。”阿辉够晒委屈噉应一句:“咩都玩得,就系唔可以玩结婚。你哋问光仔啦,佢都系噉话口架。”话口未完啫,呢头,成日将“我独身我自豪”挂喺嘴唇边,发表“大家都系成年人,自己执生”宣言嘅光仔,早已经畀阿威用棒棒糖塞住把口,冇得牙擦擦嘞。跟住,阿威就好似法官审犯噉噼里啪啦:“谂住食霸王餐啊?嚼完松?竟然唔想埋单?而家要仔唔要乸,定系两样都唔要啊?系咪始乱终弃先?如果系噉,人哋好女仔嚟嘅,你唔爱我爱!朋友妻不可窥啊嘛,我就同你断咗朋友关系,脆脆哋做你个仔嘅便宜老窦啰。”阿明即刻搭一句:“洗湿个头之嘛,咪剃鬼咗佢啰!”班友仔你一唱我一和,卒之做通阿辉嘅思想工作啰。