||
粤讲粤俗
□ 蒜蓉
过多几日年关又到嘞,旧阵时好兴嘅“煎堆碌碌,油角弯弯,卖懒歌仔,听出耳油”,咁独特嘅过年景致而家已经好少见。不过“年廿八,洗邋遢”、“逛花街,行大运”、“恭喜发财,利是扌豆 嚟”呢啲习俗一样深入民心。家阵好多家庭都新旧合璧,新年过得又有原味又新潮。自从支付宝多咗人用,就算山长水远嚟唔到,都一样可以利利是是,人唔到利是一样到啦。
“年廿三,谢灶君;年廿四,开油镬;年廿五,蒸年糕;年廿六,扫房屋;年廿七,执归一;年廿八,洗邋遢;年廿九,贴春联;年三十,团年饭”,呢啲歌仔由细唱到大,不过你话如果真系跟住日子做足全套嘅屋企,就真系少之又少啰。广府文化古老得嚟又有新血补充,后生仔一般都系百无禁忌,最紧要开心口架啦。所以新春佳节都一边舞狮舞龙一边唱K桌游,一边拜财神一边用电脑分析炒股。春节年初一、初二、初八开张舞狮就最旺场啦,相传一般都会喺十点八个字开始舞狮采青,寓意“实发”,老板发个新年财。
不过我阿妈始终都系一个传统嘅师奶,逢年廿三肯定搓面粉、包油角、堆煎堆、开油镬,“煎堆碌碌,金银满屋;油角弯弯,家财百万”,佢都系希望啲后生发大财,大展宏图。年廿四蒸年糕就肯定走唔甩鸡,步步高升啊嘛。至于团年饭,成家人喺屋企煮八餸一汤齐哇哇确实好热闹,不过又要买又要洗,煮完食饱仲要执手尾,整到一身根,所以好多人都宁愿出去食,干手净脚算数。
“初一人拜神,初二人拜人,初三系赤口,初四人乞米”,按习俗年初一除咗唔拜年之外,阿妈仲千叮万嘱,千奇唔好洗头、扫地,费事洗晒啲财气喔。所以次次年三十晚行完花街返屋企,都急急忙忙赶喺12点前搞掂晒所有嘢,其实,我系费事畀人笑我手脚慢,一个凉冲两年啫。