|
□ 潘健生
唔知其他地方嘅人对鸡系唔系咁重视，反正我呢个广州人对鸡情有独钟，一直认为此君真系生活中不可或缺之物。
最难忘细时年三十晚团年饭食鸡。广州人有话，无鸡不成宴。可见鸡喺广州人心目中嘅地位。不过由于过去供应紧张生活唔富裕，一年到晚必定有鸡食只有年三十晚嗰餐团年饭。为咗呢一餐，父亲一般提前一两个月就买定一只阉鸡，困在鸡笼“嘈肥”，年三十一早就兴高采烈咁煲滚水劏鸡，整鸡浸熟摆上供奉祖先嘅神位后装香拜祖先。但系到团年饭时，摆上饭台往往只有斩件嘅半只鸡。我哋六兄弟姊妹抱怨一家八口人十几只筷子，一人夹两嚿就冇啦，点解一年一次都唔畀食餐饱？母亲只有支吾话要留返开年时拜完祖宗再食，否则对唔住祖先。我哋只有相信啦。内心觉得唔够喉。后嚟观察得知，原来母亲系为咗留返年初二招呼嚟我哋屋企拜年嘅叔婶侄子女，免得到时失礼。以后就理解咗母亲持家嘅难处。因为嗰时父母嘅工资远远唔够开支，每到半月就要向单位“储金会”借钱先至可以挨到月尾出粮，出粮还咗借款就又所剩无几啦，请亲戚食餐有餸饭唔容易。
鸡与我除咗有美味嘅记忆仲有好玩嘅记忆。记得有一年，父母为咗满足我哋嘅要求，几分钱一只买返嚟一群“火焙鸡”(即系用温室孵化嘅小鸡)畀我哋几兄妹喂养。小鸡全身毛绒绒，唧唧唧嘅叫声令我哋几兄弟姊妹十分开心，怕佢饿亲一日喂十几次，仲趴系度观赏。用心喂养几个月后只剩低几只，最记得成活落嚟嘅“火焙鸡”生出好长嘅毛，但系就唔见长肉，一受惊竟然可以好似雀咁飞上台。啲大人话“火焙鸡”都系咁一味识得生毛就唔识得生肉，唔系点解咁便宜？
仲有一件令我记忆深刻嘅系睇阉鸡，既想睇又不忍。过街阉鸡其实系上世纪五六十年代嘅一种行当。当时三鸟供应紧缺，市民常常自家喂养，一逗鸡孵出养大鸡项留低生蛋，生鸡就阉成煽鸡，阉鸡佬应运而生。
每当阉鸡佬出现嘅时候，我哋啲细路就会好兴奋，一路跟随睇下边家人有鸡要阉，因为有鸡阉先有嘢睇。由于街坊们养鸡一般系放养，要阉鸡首先要捉鸡，呢个时候阉鸡佬就会跟随鸡主所指出其不意咁用“鸡笠”捕鸡，有时一次“笠”唔中，阉鸡佬会迅步敏捷追赶，再次挥“笠”直至得手，场面紧张刺激。
逮住只鸡后阉鸡佬会熟练将两只鸡脚用绳绑紧，再将两只鸡翼绕在一起，用脚轻轻踩住，腾出两只手喺鸡下腹掹几手毛，再从袋中攞出一把软性钢片刀，轻轻划开小腹，用一条软硬适度扁钢线两头撑开手术口，小心咁将鸡子从腹中取出。手法灵活技巧，取出嘅鸡子阉鸡者会将其放入一个早已备好嘅布袋中据为己有，礼成后将鸡毛掩回切割之处然后让其自由。被阉嘅鸡叫几声，睇住佢远去嘅身影逐渐恢复元气，整个过程我系想睇又不忍，内心矛盾，至此先舒返啖气。
不过而家鸡嘅名声就唔妥啦，报纸电视日日报H 7N 9，简直系噩耗连连。酷爱食鸡嘅广州人亦闻鸡色变风声鹤唳。家人话：此阶段唔准买鸡，外出食饭唔准点鸡，去市场买菜连鸡档都唔可以靠近。唉，我话：注意系要嘅，但系使唔使咁惊青啊？做足预防就得啦。
