||
□ 梁帅荣
挨年近晚，朋友亲戚聚会不断，餐餐都基本上食九大簋。只不过咩系“九大簋”？“簋”同“鬼”同音，有九个大簋装放菜肴，意谓筵席之丰盛。古代北方通常都系话“二簋”、“四簋”、“八簋”用双数多，唯独就系广东叫“九大簋”，九样餸菜寓意“九子登科”、“长长久久”。一般嚟讲九大簋都会选用最好、最上盛嘅材料，不过肯定冇牛，因为牛为农民耕作，出于尊重系唔会成为盘中餐嘅。
广东菜最讲究嘅系味道鲜美，地道嘅食材加上传统嘅烹调手法，充满广东特色嘅九大簋一般都难唔到巧手大厨。九大菜式嘅故事先从“鼎湖扒大鸭”讲起，将“鼎湖上素”嘅木耳、雪耳、支竹、冬菇等材料同原只大鸭一齐焖，原汁原味，食材清淡得嚟味道够晒浓香，可以食出别有一番风味，系岭南菜嘅传统佳肴。
喺1930年代，西关老字号一个有名嘅厨师将“桶子豉油鸡”加咗浓郁嘅花雕酒一齐煮，呢只鸡皮脆肉滑、色泽红润，酒味香浓，“西关花雕鸡”由此而得名，逐渐成为粤菜烹饪中嘅得意之作添。
广东沿海，系出名嘅“鱼米之乡”，相传慈禧太后中意食菊花打边炉，所用嘅菊花都出自中山小榄，“菊花炸鲮鱼球”亦系小榄一道特色家乡菜。呢道菜会选用肥美嘅鲮鱼，配上地道蚬蚧汁，外脆内软又多汁，味道无与伦比。
岭南盛宴碟碟有段古，鼎湖扒大鸭、西关花雕鸡、惠州梅扣肉、花县胶笋肉、十八涌莲藕、小榄鲮鱼球、莞城三杯鹅、中山鱼云羹、罗定豆豉虾，九大簋、九道菜、九个源远流传嘅古仔，今年嘅九大簋你食咗未啊？
