||
莫做鬼头仔豛背脊
正字正音
□王动
行走江湖，最忌畀人“豛（笃）背脊”。听闻有大学组织过一队“网络红客”，专登监视学生嘅一言一行，稍有风吹草动就去笃背脊、放暗箭，叫学生做鬼头仔，衰到贴地。
有位成都嘅学者多年嚟研究中国告密史，用广东话嚟讲，就系研究“豛背脊”嘅历史。告密，喺西文里面叫“吹鸡”，早前南华早报专访斯诺登嘅时候，就称佢为吹鸡者“w histle- blow er”，blow系吹，w histle即系哨子。而喺内地嘅话语体系入边，“豛背脊”叫做“揭发”或“举报”。“文革”嗰阵，公开、当面揭发人嘅事日日都有。陈凯歌导演嘅《霸王别姬》，段小楼同程蝶衣畀红卫兵拖出去批斗，被逼互相揭发。呢段戏重现咗老舍自杀前被批斗嘅情景，认真惨不忍睹。
坊间习惯将“豛”字写成“笃”，音义不符。孔仲南《广东俗语考》有载：“刺人曰豛。”注释云：“音笃，《说文》：”椎击物也。‘如豛穿窿，针豛肉痛，粤语惯用豛字。“段玉裁注《说文》：”谓用椎击中物也。与攴部豛、木部椓音义同。“即系话呢几个同音字都有用尖端物击打之意。旧时喺乡下，天热嘅时候食李子，先将李子夹爆，再淋上辣椒水，酸甜辣一齐嚟至够入味，然后用竹签一只一只豛嚟食，爽过豛鱼蛋。
击、打嘅工具不同、手法不同，叫法亦不同。蚊叮人叫“噆”，读“针”。《庄子》里面有句说话叫“蚊虻噆肤，则通昔不寐矣”，真系“一蚊便搅人终夕，宵小由来不在多”（赵云松《憎蚊》诗）。用刀刺物，就叫做拮。动作较大要叫碓（音对，舂具也），如碓冧、碓穿墙、一嘢碓落去。西游记第十九回：“那怪撲的跪下，望空似捣碓的一般，只管磕头。”广东话仲有将“拳打”讲成“舂”嘅。
不算题外话：涿与豛同音，孔仲南嘅书入边话：“粪曰一涿，口水亦為一涿。”以前听人讲：“中国十几亿人，一人一涿口水都浸死你啦！”讲嘅人真系唔觉自己又无能又猥琐。
豛(du)
