|
□黄承炬
外省人话粤语系“鸟语”，虽则带啲贬意，但系我都几认同口架。皆因讲起粤语嚟就好似雀仔一样“好唱口”，直情就系同唱歌仔差唔多。
记得两年前嘅广州亚运会开幕式，一首童谣《落雨大》赚足咗鬼佬同埋全国人民嘅耳油。我哋单位一个“南下同事”大嗌好嘢，问我有冇办法揾到《落雨大》嘅歌谱歌词，佢要教对仔女唱。我话：“唓！使乜谱啫，我抄啲词畀你，照读咪等于唱啰！”真系口架，《落雨大》读起嚟嘅效果同唱出嚟就系差唔多。
广州好多传统嘅童谣都同《落雨大》一样好听口架，唔少几十岁嘅广州人，怕且都系听住阿妈嘅呢只摇篮曲大嘅：“月光光，照地堂，虾仔你乖乖瞓落床。听朝阿妈要捉鱼虾啰，阿嫲织网要到天光。虾仔你快高长大啰，撑船撒网就更在行……”若果系臊虾女，就唱：“暧猪乖，嫁后街，后街有鲜鱼鲜肉卖，仲有鲜花戴，戴吾晒，摆落床头畀老鼠拉，拉拉拉，拉去大新街……”噉样嘅摇篮曲根本唔使曲谱，阿妈只系滋滋油油有感情噉读歌词，就有唱嘅效果，系噉如诉如唱，个臊虾就慢慢瞓着咯。
重记起童年嗰阵时，“跳橡筋”嘅游戏风靡全国，学生妹、僆女一边跳，一边夹住跳嘅节拍唱歌仔。北方嘅“橡筋歌”系要音乐老师编曲先至唱得口架，而广州嘅“橡筋歌”就唔使编曲啰，照词噏就得：“董存瑞，十八岁，为国牺牲炸堡垒，炸到堡垒咯咯脆，全国人民流眼泪，我哋要学董存瑞。”“执到两分钱，留返嚟过年；过年有嘢食，献畀毛主席；主席话我乖，带我行花街。……”“日又跳，夜又跳，跳跳埋埋诈妈娇。妈——妈——畀分钱我，买条橡筋再嚟跳。”嗰时我就读嘅小学搞跳橡筋比赛，听住老师用手风琴伴奏呢几首橡筋歌，觉得好好听又好新奇———粤语用乐器伴奏都得。
其实一啲都唔出奇，粤语发音富有音乐性，我哋粤语就系音乐噉嘅语言。道理好简单，粤语有9个声调，音乐有7个基本音阶，两家搭配起嚟就塌塌冚啰。有个音乐老师话畀我听，是但一句粤语嘅声调都可以喺钢琴上便弹出嚟，即系话用粤语讲乜嘢都可以“钢琴伴奏”嘅。
讲嘢就系唱歌仔，呢个喺童谣里边零舍突出，传统嘅童谣都系“冇谱”口架，讲唱一体，就噉读词，听起嚟就同唱一样。广州啲后生仔后生女，我希望你哋学返几只，教畀你哋嘅仔仔女女，让我哋粤语音乐噉嘅语言，承传古代优雅语言嘅遗风，一路弘扬落去。
比如以下呢啲经典童谣：
《月光光》：月光光，照地堂，年卅晚，摘槟榔。槟榔香，买子姜；子姜辣，买芙荙；芙荙苦，买猪肚；猪肚肥，买牛皮；牛皮薄，买菱角；菱角尖，买马鞭；马鞭长，起屋梁；屋梁高，买把刀；刀切菜，买镬盖；镬盖圆，买只船；船沉底，浸死两个番鬼仔，一个蒲头，一个浸底，一个摸茨菇，一个摸马蹄。
《凼凼转》：凼凼转，菊花圆，炒米饼，糯米团。阿妈叫我睇龙船，我唔睇，睇鸡仔，鸡仔大，捉去卖。卖得几多钱？卖得三百六十五个仙。
《点虫虫》：点虫虫，虫虫飞，飞去荔枝基。荔枝熟，冇埞伏；伏落屋，满屋红，陪住个细蚊公。
《麻雀仔》：麻雀仔，担竹枝，担上枝头望阿姨。阿姨梳只玲珑髻，摘朵红花伴髻围。裙带又长脚又细，咁好花鞋踩落泥。
《捞鱼仔》：花手巾，真引人，基边捞鱼好过瘾，一兜一条好手运，千祈唔好踎到头晕。
呢啲童谣都系生草药医瘡———照噏就得（口架）啦，唔使曲谱嘅。至于节拍嘛，依照唱嘅环境自由处理咪得啰！
（口架）-------为一个字
