|
| 无鸡不成广 |
食在广州 □ 南蛮姑娘 食鸡，原本系平常事，根本不值一提。一个月之内，边个冇食过三五次鸡？只不过，由于前段时间韩剧《来自星星的你》热播，炸鸡啤酒变成抢手货，真系焮过辣鸡(焮，《广韵》解释为“火气”，形容情绪极其激烈，对某人或某事嘅热度比电烙铁仲热)。当然，呢啲只不过系关于鸡嘅头条新闻之中嘅鸡碎。想当初，面对来势汹汹嘅H 7N 9疫情，一夜之间，靓鸡过街，人人喊杀。 广府人素来钟意食鸡，但凡喜席宴请，就算摆满鲍参鱼翅，冇咗白切鸡，亦难成体统。所以，喺一个对鸡如此器重嘅城市入面大肆杀鸡，边个街坊可以淡定？话之你系SA R S，定系H 7N 9，广府人依然视死如归猛噉食。毕竟，鸡唔单止系广东人口中皮爽肉滑、骨香汤靓嘅地道美食，更加系呢座城市嘅口语文化标识。 岭南各地皆好鸡，譬如大名鼎鼎嘅葵花鸡、清远鸡、文昌鸡、广油鸡、同记鸡、太爷鸡、路边鸡、胡须鸡、乞儿鸡、猪肚鸡、三杯鸡等等。鸡嘅烹煮方式更系包罗万象，蒸、煮、炒、炸、煎、炆、炖、焗、烩、烧、卤，甚至乎连“叮”都有。可以讲，广东人食鸡已经达到咗一种超级境界，直情就系冇鸡不欢。如果霎时间剥夺咗广府人食鸡嘅权利，必定要鸡飞狗跳，乱成一笼啦。 鸡仲系广东人生活中必不可少嘅文化元素。自古以嚟，鸡就有德禽之称，如一鸣天下白、闻鸡起舞、鸡鸣之助等褒义成语，都表达咗人对鸡嘅赞赏。同时，古人仲话，鸡有文、武、勇、仁、信五德。即系鸡冠为“文”，鸡爪为“武”，鸡嘅性情好斗为“勇”。至于“仁”，系指鸡报晓从嚟唔失“信”，如约而至。有意思嘅系，喺钟情于食鸡嘅广东人口中，鸡嘅用法居然大多数都系贬义词。最典型嘅，莫过于北语嘅“召妓”，到咗广东话就变成音译直读嘅“叫鸡”。再如嘲讽一个人赔咗夫人又折兵，叫做“偷鸡唔掂蚀楂米”；描述某人言语闪缩，就会称之为“鸡声鸡气”，啰啰嗦嗦为“拜神唔见鸡”，强词夺理就系“死鸡撑硬脚”，等等。 鸡几乎都囊括咗广东人由朝到晏嘅所有生活细节。譬如话，飞驰喺公交车站通勤路线上嘅“三脚鸡”(野鸡车)；晨早流流，就鸡咁脚噉跑去追公交；上班时间，大家都系一边工作一边又静鸡鸡噉玩淘宝同微博；喺电影院睇咗一部烂片，一出来就会同帮朋友埋怨话：“唉，部片咁鸡口架。”可见，鸡已经完全俘虏咗广东人嘅心肝脾胃肾，就算佢唔上头条，都已经够晒巴闭喇。 |
